Et bliev nix wie et wor (Prädig op Kölsch 2013) (Offg 21, 1-5a)

Leev Mädche un Junge vun Maye,
leev Fastelovendsjecke!

Ihr wisst et all:
Mer levve en ener knatschverdötschte Welt.
Et es verröck, wie flöck sich alles ändere deit!
Et bliev nix, wie et wor.
Dat kanns do am eige Liev erlevve:
Do luurs morgens en der Speegel un denks:
dat Geseech hätt jo kaum Ähnlichkeit mih
mit däm op dingem Pass.
Un dann stells do fass,
dat dä Pass zick Johre avgelaufe es.
Dä Bleck op dat Dokument säht dir:
Do existeers jo nit mih.
Do häs quasi ding Sterveurkund en de Häng.
Han ich nit Räch?

Et bliev nix wie et wor.
Denkt an de Foßgängerzon en Maye,
besonders an de Göbelstroß:
wann de do e paar Dag nit gewäs bes,
dann hät als widder e Geschäff zo gemaht.
Un wo jet neu opgemaht weed,
is dat entweder ene Lade met Billigklamotte
oder en Fressbud.
Han ich nit Räch?

Dat Einzige, wat in Maye zeitlos schön es
un wahrscheinlich  noch en Hääd vun Johre glich bliev,
es de Chressdagsbeleuchtung en der Käänstadt.
Von sujet dräump de Welt.
Jet Schöneres kann mer sich üvverhaup net usmole.
Han ich nit Räch?

Doch wo de söns och hinluurs: Veränderunge, Veränderunge.
För e  Beispill en der Gesellschaff:
Früher kome Schwule en der Bulles,
wann se ihr sexuelle Orientierung uslevve wollte.
Dat wor noch bes 1969 esu.
Dat die hüggzedags Levvenspartnerschafte engonn dörfe,
gitt et eesch zick  zwölf Johr.
Dat es en rasante Veränderung em gesellschaftliche Levve.
Han ich nit Räsch?

Die Veränderunge maache ävver och vör der Kirch nit hald.
Mer steche medden dren en der Strukturreform,
un ehr all hat ald erläv, wat dat bedügg.
Da künnt ich mich stundenlang drüvver usloße –
maachen ich evver nit.
Denn de Kirch deit sich met Veränderunge ärg schwer.
Han ich nit Räch?

Veränderunge –
egal ov en der Kirch, en der Gesellschaf ov em Handel –
wääde von uns luuter wohrgenomme wie en  Veränderung zom Schläächte.
Un dann heiß et:
„Fröher wor alles besser: de Kirch, de Seelsorge, de Schull, die Lehrer,
der Handel, de Moral, un die Pänz wore nit esu frackig,
un all woren se nit esu aansprochsvoll.“
Die Zigge woren dem Geföhl noh einfach besser
und mer sehnt sich donoh zoröck.
Han ich nit Räch?

Ävver esu einfach es dat nit.
Veränderunge hät et zo alle Zigge gegovve,
und der Wandel es dat einzig Beständige en der ganze Geschichte,
och en der Kirchengeschichte.
Villeich ging dä Wandel fröher nit esu rösig vüran.
Sugar en der Bibel weed de domolige Gägenwart beklag
un – wie en der Lesung gehoot –
mit dem Trustwood kommenteert:
“Luurt, ich maachen alle neu.“
Die Verheißung „Ich maachen alles neu“ meint nit
„ich dun  der aale Zostand wider herstelle“.
Jet Neues soll weede: „luurt, ich maachen alles neu.“
Et muss wigger vüraan gonn – un nit zorück.
De Kirch steiht vör dä Aufgab,
ihr Zokunf neu zo erfinge un zo erarbeide
und nit die ahl Zigge zorück ze holle.
Met andere Wööd:
De Piusbröder sin nit de Zokunf vun der Kirch;
dann dä konservative Krom höllt keine eine zurück.
Die Weiche in Rom müsse ömgelaht weede,
se müsse in Richtung Zokunf gestallt weede.
Un domet han mer alle Häng voll zo dun.
Han ich nit Räch?

Üvvrigens:
Wä dat, wat hügg alles ömgemodelt weed, nit richtig fingk,
dä darf sich trüste met dem Kölsche Grundgesetz Paragraf  5:
„Et bliev nix wie et wor.“
Dat gilt eines Dags och för de Strukturreform,
wann se eesch ümgesatz un avgeschlosse is.
Dann solls do sinn, dat ich Räch han.

Wä hügg de Minsch erreichen will,
dä muss met der Zigg gonn.
Dann: „Wä nit met der Zigg geiht,
dä muss … mit der Zigg gon“ (Bernd Stromberg).


Ich bedanke mich för et Zohüre
un wünschen üch ne himmlische Fastelovend
met dreimal:
Maye Mayoh,
Maye Mayoh,
Maye Mayoh