Der Sabbat es für der Minsch do, nit ömgedriht (Prädig op Kölsch 2017) (Mk 2, 27)

Leev Mädcher un Junge vun Maye!

Wie schön, dat mer widder all zosamme sin.
Dat Evangelium, wat ich grad vürgelesse han,
erinnert mich an der Wahlsproch vun mingem Bischof,
wie ich noch klein wor.
Der Wahlsproch dät heiße: „Vita et Pax“.
Op god Kölsch heiß dat:
„Levve un levve looße.“
Wie et ussüht, hät der Jesus och esu gedaach.
De Pharisäer, die sich domols pflichgemäß
övver klein Sabbatschänder opräge däte,
kommenteet der Jesus mit dem Wood:
„Der Sabbat es för der Minsch do!“
Dat es doch en gode Levvensenstellung.
Han ich nit Rääch?

Unsere gode Paps Franziskus denk wohl genau esu.
Hä sök nämlich noh enem Wäg,
geschiedene Paare neu Perspektive för en neu Ih zo gevve.
Ävver dat im Momang gültige Kirchenrääch lööt dat nit zo.
Un so es dat denne kleine wie denne große Phärisäer,
die et jo hügg en der Kirch zo Basch git, Wasser op de Müll,
öm der Paps zo kretiseere.
Zo denne gehööt och der Kölner Ex-Erzbischof Kardinal Meisner
un e paar andere Kardinäle em Ruhestand:
alles Besserwisser, die gään en et Fettdöppe tredde.
Woröm säht der Paps nit einfach:
„Die Ihr es för der Minsch do. Basta!“
un lööt en zweite Ih zo?
Han ich nit Rääsch?

Dann bröht der Paps de gescheiterte Ih nit für nichtig zo erkläre,
nä, hä deit se einfach oplöse.
Künne kann hä dat. Und dat hä dat kenn!
Immerhin es hä doch der Paps.
Han ich nit Rääch?

Un üvverhaup:
Wat es dat för en Aat,
e Kirchenmitglied, dat sing Kirchenstüür bezahlt,
von der Kommunion uszuschleeße,
nor weil et met de Kirch nit einer Meinung es?
Wä berapp, hätt och Aansprüch!
Han ich nit Rääsch?

God, plausibel wör jo villeich die Regelung:
Wä kein Kommunion krigge kann,
bruch och kein Kirchenstüür zo berappe.
Brudnüdig hät de Kirch de Nüssele jo nit!
Han ich nit Rääch?

Wat mich en letzter Zigg bewäg hät:
Noh dem Terroranschlag om Berliner Weihnachtsmaat
gov et en der Gedächniskirch ene ökumenische Goddesdeens.
De Ökumene bestund do nit nor us de Chresteminsche,
näh, alle andere Religione, die en Berlin vertrodde sin,
woren ebenfalls dobei.
En der Nut woren se all noh zosammegeröck.
Do es mir klor gewoode:
Der eine Herrgodd es för se all do.
Han ich nit Rääch?

Leev Lück, dot god op üch oppasse!
Blievt gesund un maht üch Freud,
denn et Levve duurt kein Ewigkeit.
Mayoh!